По паметните телефони и телевизори, на пазарот сега ќе бидат достапни и паметни прозорци. Оваа иновација е производ на германската компанија Rehau, која ги нарекува и прозорци на иднината. Прозорците наизменично го пропуштаат воздухот од просторијата надвор, а го внесуваат чистиот воздух однадвор и го загреваат или го ладат во зависност од температурата надвор.
Благодарение на интегрирани сензори кои ја мерат влагата и содржината на јаглерод диоксид во воздухот, овие прозорци самостојно одлучуваат кога и со кој интензитет ќе го применат вентилацискиот систем. Паметните прозорци содржат и дигитална заштита од сонце и од љубопитни погледи. Автоматски се затемнуваат доколку некој се задржи пред нив подолго од 30 секунди. Дигиталната заштита се управува и директно преку прозорското стакло чувствително на допир.
Уште еден интелигентен додаток е алармниот систем на прозорците, чија цел е и пред потенцијална употреба на сила провалникот да биде предупреден со спуштање на ролетните или правење повик за помош. Овој систем на проветрување е награден со наградата Plus x award во категоријата иновации, квалитет, функционалност и екологија.
Rehau најави дека набрзо по саемската презентација овие прозорци ќе бидат достапни на пазарот на 170 локации во светот каде што компанијата има свое претставништво или фабрика.