Заменик претседателот на Владата задолжен за европски прашања, Бујар Османи во улога на Национален координатор за распределба на странска помош во земјава оствари видео-конференција со билатералните донатори.
Пред учесниците на денешната видео-конференција вицепремиерот Османи реферирал за последните актуелности поврзани со КОВИД 19, како и за мерките и активностите на Владата за справувањето со оваа глобална пандемија.
– Дозволете на почеток, во името на Владата, да изразам огромна благодарност за досегашната помош која пристигнува постојано од сите страни на светот. Тоа покажува дека и покрај силниот интензитет на кризата, тоа не го менува долгорочниот пријателски однос и досегашната успешна соработка. Искрено верувам дека овие активности и успешните меѓусебни односи ќе продолжат и во иднина, со што не само што полесно ќе се надмине кризата, туку со заедничките напори, соработката и заемната поддршка ќе излеземе посилни од неа, истакнал Османи, соопштија денеска од Секретаријатот за европски прашања.
За време на Донаторската конференција Османи ги претставил приоритетите и потребите на земјава во борбата со епидемијата КОВИД 19, како и за справување со предизвиците кои произлегуваат од оваа криза.
Во таа насока, вицепремиерот Османи ги претставил и анализите и прогнозите на Владата за социо-економските последици што се очекуваат, како и можностите за донаторите преку поддршка и билатерална соработка да ѝ помогнат на земјата во справувањето и со овие предизвици.