Ставот на Владата е дека политичките партии треба да бидат подалеку од Армијата и тој став е јасно изразен во измените на Законот за служба во Армијата, рече на денешната прес-конференција владиниот портпарол Душко Арсовски, во одговор на прашање поврзано со вчерашната објава на Фејсбук профилот на Општинската организација на СДСМ – Арачиново.
Тој напомена дека Министерството за одбрана уште вчера јасно порачало оти Армијата треба да и служи на државата, не на партиите.
Од Министерството за одбрана тврдат дека ќе изберат војници кои ќе ги исполнат критериумите, а влијанија не се дозволуваат.
-Ќе се води сметка за соодветна и правична застапеност на граѓаните кои припаѓаат на сите заедници, со почитување на критериумите за стручност и компетентност, велат од МО.
ОО на СДСМ – Арачиново вчера преку својата Фејсбук страница ги повикувала кандидатите што аплицирале на Огласот за прием на војници во Армијата „да се пријават кај претседателот на огранокот во Арачиново или кај членовите на раководството на огранокот на СДСМ – Арачиново“.