Во големата купола на Собранието, под посебни здравствени протоколи, почна првата седница на новиот парламентарен состав.
Просечната возраст на новоизбраните 120 пратеници е 45 години. Во собраниските клупи седнаа 77 пратеници и 43 пратенички.
Во новиот собраниски состав има 16 нови пратеници кои се на возраст од 23 до 35 години. 23-годишната студентка Артина Ќазими од гостиварски Добри Дол кандидатка на Алијанса за Албанците и Алтернатива е најмладата народна избраничка. Додека највозрасни пратеници се 72-годишните Стојан Миланов (ВМРО-ДПМНЕ и Коалицијата) и Илија Николовски (Коалиција „Можеме” предводена од СДСМ).
На предвремените парламентарни избори одржани на 15 јули, Коалицијата на СДСМ „Можеме“ освои 46 пратенички мандати, на ВМРО-ДПМНЕ „Обнова на Македонија“ – 44, ДУИ 15, коалицијата на Алијанса на Албанците и Алтернатива 12, Левица два и еден ДПА.
Во Собранието денеска на првата конститутивна седница се гласаше избор на претседател и членови на Верификационата комисија на Собранието на Република Северна Македонија.
Вкупно гласаа 117 пратеници. „За“ гласаа 115 пратеници, „Против“ нема, „Воздржани“ двајца пратеници.
За претседател на Верификационата комисија на Собранието е избрана Јагода Шахпаска, а за членови се избрани пратениците Изет Меџити, Благица Ласовска, Соња Мираковска и Сафије Садики Шахини.