Фондацијата „Тијана Јуриќ“ предупреди денеска дека Србија го слави 25 мај, Меѓународниот ден на исчезнатите деца, со загрижувачка статистика, затоа што меѓу 1.300 и 1.500 деца исчезнуваат во оваа земја секоја година од различни причини и дека е клучно да се предупреди јавноста со цел тие да се пронајдат, јавува агенцијата Бета.
„Иако зборот исчезнување најмногу се поврзува со киднапирање, причините за исчезнување се различни, така што обично се случува детето да избега од куќата или установата каде што живее на своја иницијатива. Има и киднапирања од родители, но и најопасни, од непознати лица, кои можат да го стават животот на детето во опасност“, велат од Фондацијата.
Како што беше речено, за многу исчезнувања нема информации и мал број од нив стигнуваат до јавноста, исклучиво благодарение на вклученоста на семејството и „многу е важно да се нагласи дека алармирањето на најшироката заедница може да биде клучно“.
„Фондацијата Тијана Јуриќ се залага за воведување систем за јавно предупредување – „Amber alert“. Овој систем е многу важен и ќе овозможи брзо и ефикасно предупредување на целата јавност, што значително би го зголемило бројот на успешно решени киднапирања”, велат од Фондацијата и додаваат дека тој процент во земји каде овој систем се применува е околу 90 проценти.