Бројот на модели на електрични автомобили достапни за потрошувачите во Европа се очекува тројно да се зголеми до 2021 година, според проценките на Европската федерација за транспорт и животна средина.
Моментално продажбата на нови електрични возила бележи застој по првичниот моментум, најмногу поради недоволната инфраструктура за полнење и високите цени.
Најновите податоци покажуваат дека автопроизводителите ќе понудат 214 модели на електрични автомобили во 2021 година, што е згоелмување од 60-те модели што беа достапни на крајот на 2018 година.
Подостапните опции можеби ќе ги поттикнат потрошувачите да се префрлат од дизел и бензин побрзо отколку што се очекуваше.
Анализите на Европската федерација за транспорт и животна средина заснована на податоци од истражувачката фирма IHS Markit, покажуваат дека производителите сега се подготвени да ја прифатат електрификацијата.
Се очекува во 2021 да има 92 целосно електрични и 118 хибридни модели на европскиот пазар.
Норвешка е прва во светот по број на продадени електрични автомобили
Ако се одржува овој тренд, можно е до 2025 година 22% од произведените возила да бидат електрични, што ќе им помогне на автопроизводителите да ја остварат целта поставена од ЕУ за намалување на испуштањето на јаглерод диоксид на 95г/км до 2025.
Најголемите фабрики за производство на електрични автомобили ќе бидат во Германија, Франција, Шпанија и Италија, покажуваат најновите податоци. Потврдено е дека до 2023 година низ Европа ќе бидат почнати со работа 16 големи фабрики за производство на литиум-јонски батерии.
Дури и луксузните автомобилски брендови го прифатија трендот. Неделава брендот Lotus, што е во сопственост на кинески Geely, го покажа електричниот хиперавтомобил Evija што има брзина од 322 км/ч и чини 2 милиони фунти.
Во март годинава, Automobili Pininfarina го лансираше Battista, хиперавтомобил во истата ценовна група.
Пораката на овие производители е дека електричните модели може да бидат подеднакво гламурозни и возбудливи, а не само еколошки оправдани.