Премиерот Зоран Заев денеска одговараше на повеќе прашања поврзани со неговото интервју за медиум од Република Бугарија. На прашањето, дали ги видел реакциите на социјалните мрежи премиерот Заев одговори:
-Ги видов и ги разбирам реакциите на социјалните мрежи, но лидерите треба да ја водат државата. Истите тие мои сограѓани споделуваат иста историја како и мојата. Антифашистичката борба е дел и од моето семејство, дел од градот во којшто живеам. Но тоа историско минато не треба да нѐ ограничува во трасирањето на патот на нашата европска иднина. Наша должност и како народ и како нација, а посебно моја должност, е да ги правам чекорите и да градам пријателство низ призмата на европската иднина. Дури 85% од граѓаните се за интеграција во ЕУ и ако не гледаме низ призмата на простувањето, низ призмата на пријателството, низ призмата на подавањето рака, треба да знаеме дека тоа не е начин за исполнување на целта на патот по којшто тргнавме, одговори Заев.