Премиерот Зоран Заев денес од собраниската говорница изјави дека не ни треба Европска унија, ако некој сака да преговараме за македонскиот јазик и македонскиот идентитет.
„Во Софија разговаравме за патоказотот кој стои во португалскиот предлог. Во тој патоказ се опишани сите облици на соработка, со датуми, како што е изградба на патна инфраструктура, отворање гранични премини и други облици на соработка. Во однос на јазикот стои дека говориме два слични, но различни и меѓународно признати јазици. Ние сличен јазик имаме и со Србите, Хрватите и други словенски народи“, рече Заев, одговарајќи на прашање на пратеничката на ВМРО-ДПМНЕ, Рашела Мизрахи.
Тој објасни дека со Бугарија се разговара за патоказ, што е предлогот во португалското решение на проблемот. Рече дека после изборите во Бугарија и формирањето на влада верува дека ќе продолжат преговорите за изнаоѓање заедничко решение.