Поранешниот премиер Зоран Заев преку социјалните мрежи им се обрати на учесниците на денешниот собир на Маркова Нога во Преспа, на македонско-грчката граница.
Заев очекува што поскоро да се отвори граничниот премин Маркова Нога, како што вели, нашите две пријателски држави го превезмаа како обврска од Договорот од Преспа.
-Отварањето на граничниот премин Маркова Нога е наша обврска кон сегашноста и иднината – ова е вистинското и крајно време да ја срушиме неприродната блокада на природниот тек на брегот на Преспанското езеро. Очекувам дека во најбрз можен рок ќе се завршат неопходните инфрастурктурни интервенции и дека многу скоро ќе се најдеме таму на официјалното отворање на преминот што ги поврзува двете страни на Преспа, потенцира Заев.
Поранешниот премиер верува дека денешното дружење, како и она од минатиот викенд за време на манифестацијата „Запознај ја Преспа“ ја прави Преспа плодна почва за раст и развој на нашиот европски Балкан, мегдан за спојување на различните и блиските култури и пркос кон оние кои во 21 век се уште се водени од омразата наместо од мирољубието.