Ќе ги повикам моите колеги во Собранието да се одважат, да го ставиме на дневен ред Законот за матична евиденција со којшто ќе ги регулираме назнаките на трансродовите лица. Но, и да одиме чекор понатаму и да размислуваме за давање исти права и на оние коишто живеат во истополови партнерства, рече пратеничката од ЛДП, Моника Зајкова за време на Парадата на гордоста што по третпат се одржа во Скопје.
– Мене ми е драго што толку луѓе даваме поддршка за достоинството, правдата и еднаквост затоа што и самиот Устав не дефинира како еднакви граѓани на оваа земја. Во 21 век незамисливо е што сеуште сведочиме на дискриминации само затоа што некој го живее животот според сопствената определба. За споредба, тоа е како да утре мене некој ме дискриминира затоа што сум се родила со кафени очи, а не со зелени, рече таа.
Според Зајкова ова не е само протест за дискриминацијата и стигмата туку порака да ги разбуди сите за да разберат дека ЛГБТ заедницата има право на јавниот простор како и сите луѓе. Како Влада направиле чекор напред со Законот за спречување и заштита од дискриминација и формиравме независна комисија но потребни се уште залагања. Таа додаде дека животот не го гледа меѓу четири ѕида туку секој отворено да шета со својата партнерка или партнер како и сите останати.
– Тука сме за сите наши блиски и далечни, за сите наши познати и непознати, коишто биле избркани од дома зашто се геј, коишто биле избркани од работа зашто се ‘транс’, и коишто физички и психички се малтретирани, зашто не влегуваат во тесните рамки на она што некој го нарекува нормално. Сепак на крајот од денот сите ние сме луѓе кажа и плаќаме еднакво даноци, имаме еднакви обврски, ред е и да уживаме еднакви права, рече Ева Цветковска од Универзитетското студентско собрание.
Годинашниот собир се одржа под мотото „Излези за љубов, достоинство, еднаквост, правда”, а учествуваа неколку илјади припадници на ЛГБТИ заедницата и бројни нивни поддржувачи.
Поддршка на парадата и годинава дадоа претставници од Владата, меѓу кои и вицепремиерот Бојан Маричиќ и министерката за труд и социјала, Јованка Тренчевска, како и пратенички од актуелниот собраниски состав.
Меѓу бројните поддржувачи беа и претставници од странските амбасади и дипломатски мисии во земјава. Парадата почна од паркот „Жена борец”, по што поворката продолжи низ центарот на Скопје и покрај Владата, а крајната дестинација беше стадионот на АРМ во Градскиот парк. Беше видливо и засилено полициско обезбедување покрај поворката.