Бугарското министерство за надворешни работи продолжува со особено внимание да го следи поттикнувањето на кампањата на опозицијата во Република Северна Македонија (РСМ) против бугарските клубови и нејзината инструментализација за внатрешно-политички цели. Ваквото однесување е само во корист на фактори или трети лица кои имаат интерес да ја попречат европската интеграција на нашиот сосед. Ова денеска на брифинг го истакнал заменик-министерот и портпарол на бугарското МНР, Костадин Коџабашев.
Тој ги коментирал измените и дополнувањата на Законот за здруженија и фондации и на Законот за политичките партии, донесени од македонското собрание на 2-ри ноември.
-Со објавувањето на измените во Државен весник, законите всушност стапуваат на сила. Во оваа прилика веќе се зазеде став и Министерството за надворешни работи на Бугарија. Постои сериозна загриженост дека со законски измени и како резултат на еднострано толкување на историските факти и поединци може да се ограничи правото на здружување, рече заменик министерот Коџабашев.
Тој зборувал и за Советодавното тело во нашата земја за одлучување во врска со контроверзните имиња на клубовите, здруженија или партии.
-Се наметнуваат легитимни прашања од типот: кој ќе врши контрола врз мислењата на телото, има ли право на жалба на нејзините одлуки, кои се критериумите по кои комисијата ќе се води во својата работа. Впечатливо е и тоа што измените во еден ваков важен закон за граѓанското општество се донесени без претходна широка јавна расправа, истакна заменик министерот Коџабашев.
-Останува да видиме дали владата во Скопје ќе го испрати Законот за здруженија и фондации на мислење до Венецијанската комисија. Сметаме дека, сепак, доколку се пристапи со соодветно внимание и грижа за човековите права, требаше однапред да се испрати ваков важен предлог закон за право на мислење, бидејќи сега во пракса законот почнува да се применува, коментира заменик-министерот Коџабашев, пренесува БТА.