Градот Скопје денеска почна голема акција за расчистување на дивата депонија во Визбегово, која претставува повеќедецениски еколошки проблем за Скопје, а особено за жителите на околните општини Шуто Оризари, Бутел и Чучер Сандево. Од оваа депонија која се протега на површина од 10 хектари (околу 10 фудбалски игралишта) ќе бидат расчистени околу 50.000 кубни метри шут и комунален отпад.
Министерот за животна средина Насер Нуредини на денешната прес-конференција изјави дека не може да се каже колку диви депонии има во земјава, бидејќи тие се нелегални и нема официјална бројка за тоа.
„Имаме соработка со Швајцарската амбасада за депонијата Русино. Работиме во Северниот и Североисточниот регион, имаме активности и на тој план, 39 камиони се веќе испорачани. И во југоистокот и во југозападот имаме активности во насока на креирање централен систем за отпад“, истакна Нуредини.
Градоначалникот на Скопје Петре Шилегов, посочи просторот потоа ќе биде зазеленет.
„Овој проблем постои повеќе децении и директно влијаеше врз квалитетот на воздухот, бидејќи депонијата често се самозапалуваше или ја палеа несовесни граѓани. Денешната акција е доказ дека извонредната соработка меѓу локалната и централната власт може да резултира со конечно решавање на ваквите проблем“, рече Шилегов и најави зголемени контроли на инспекциските служби.
„Работиме заедно со сите локални власти во земјава. Со градоначалникот на Скопје разговараме за подобрување на депонијата „Дрисла“. За депонијата Русино имаме план и соработка од швајцарската амбасада. Работиме во северот и во северо источниот регион, како што знаете инвестираме 38 милиони од ИПА 2 програмата. 39 камиони веќе се набавени. И во југо истокот и во југо западот имаме активности за креирање на централен систем за отпад“, додаде Нуредини.
За чистење на дивата депонија во Визбегово, Министерството за екологија ќе исплати повеќе од 300.000 евра.