Светската здравствена организација (СЗО) соопшти дека ќе ги замрзне вработувањата и ќе ги ограничи патувањата откако претседателот Доналд Трамп објави дека се повлекува од организацијата.
- Како што знаете, Соединетите Американски Држави ја објавија својата намера да се повлечат од СЗО. Жалиме за оваа одлука и се надеваме дека новата администрација ќе ја преиспита“, изјави генералниот директор Тедрос Аданом Гебрејесус во мејл до персоналот.
„Оваа објава ја направи нашата финансиска состојба уште поакутна и знаеме дека создаде голема загриженост и неизвесност за работната сила на СЗО“, додал тој.
Како одговор, СЗО „го замрзнува регрутирањето освен во најкритичните области“ и „значително ги намалува патните трошоци“.
Сите состаноци сега мора да бидат целосно виртуелни, освен во исклучителни околности, а мисијата за техничка поддршка во земјите треба да биде „ограничена на најважното“.
Според „Политико“, другите мерки вклучуваат ограничувања за замена на ИТ опрема, повторно преговарање за големи договори и суспендирање на реновирање на канцелариите и капитални инвестиции, освен ако не е неопходно за безбедност или намалување на трошоците.
Во меѓувреме, италијанскиот вицепремиер Матео Салвини исто така предложи закон за повлекување на Италија од СЗО, пренесува RT Balkan.