Официјалниот претставник на Министерството за надворешни работи на Русија, Марија Захарова, изјави дека рускиот министер за одбрана Сергеј Шојгу разговарал со неговиот француски колега Себастиен Лекорну „достоинствено и службено“, а не како што го карактеризира францускиот претседател Емануел Макрон, пренесува Спутник.
Таа се осврна на изјавата на претседателот Макрон кој по телефонскиот разговор меѓу Шојгу и Лекорну рече дека рускиот министер имал „чуден и заканувачки“ разговор со францускиот колега.
„Не „чудно и заканувачки“, туку достоинствено и службено. Прочитајте го соопштението на Министерството за одбрана на Русија. Но, Русија нема намера да ги поштеди оние кои го спонзорираат беззаконието на режимот во Киев – тоа е сигурно“, објави Захарова.
Телефонскиот разговор меѓу Лекорну и Шојгу, кој беше инициран од Париз, се одржа во средата. Како што соопшти рускиот воен оддел, за време на разговорот францускиот министер „упорно се обидувал да го убеди својот руски колега дека Киев и западните земји не биле вмешани во терористичкиот напад“ во „Крокус“.