Францускиот претседател Емануел Макрон повторно не ја исклучи можноста за испраќање на западни воени сили во Украина. Тој во интервјуто за британски „Економист“ изјави дека мора „да го поставиме ова прашање доколку Москва ја пробие првата линија на фронтот и доколку Киев тоа го побара“, пренесуваат француските медиуми.
„Доколку Русите ги пробијат линиите на фронтот и доколку пристигне барање од Украина (што не е случај денес) мораме легитимно да се запрашаме. Да се исклучи тоа прашање априори значи дека не ја научивме лекцијата од изминатите две години, кога земјите од НАТО првично ја отфрлија можноста за испраќање тенкови и авиони во Украина пред конечно да се премислат“, вели францускиот лидер.
Веќе во февруари, Макрон ја покрена можноста за испраќање западни трупи на украинска територија, потсетува БФМ.
„Како што кажав, не исклучувам ништо бидејќи има некој од другата страна кој ништо не исклучува. Без сомнение, бевме премногу сомничави кога ги дефиниравме границите на нашата акција“, рече францускиот претседател.
„Имам јасна стратешка задача: Русија не смее да победи во Украина. Ако Русија победи во
За Украина нема да има безбедност во Европа“, додаде тој.
„Кој може да тврди дека Русија ќе застане таму? Каква безбедност има за другите соседни земји, Молдавија, Романија, Полска, Литванија и многу други? И тогаш, каков е кредибилитетот на Европејците кои би потрошиле милијарди, велат дека е прашање на опстанок на континентот, а не обезбедуваат средства за да се запре Русија? Така да, не треба ништо да исклучуваме“, посочи Макрон.