Претседателот на Европскиот совет, Шарл Мишел, денеска повика на итна и транспарентна истрага за наводните нерегуларности за време на парламентарните избори во Грузија и најави дека ова прашање ќе го вклучи во агендата на самитот на ЕУ во ноември.
„Ја добивме прелиминарната оценка на ОБСЕ/ОДИХР и ја повикуваме Централната изборна комисија и другите релевантни органи да ја исполнат својата должност и брзо, транспарентно и независно да ги истражат и разгледаат изборните прекршувања и наводи. Овие наводни прекршувања мора сериозно да се истражат и отстранат“, изјави Мишел, а пренесува грузискиот портал „IPN“.
Според него, Европската унија продолжува да го повикува раководството на Грузија да покаже силна посветеност на патот на земјата кон Европската унија.