Лекарите, медицинските сестри и возачот на брза помош се меѓу 47-те лица на кои им се суди за предизвикување смрт на 10 бебиња како дел од наводната шема за измама на турскиот систем за социјално осигурување, објавуваат светските медиуми.
Обвинетите се теретат дека ги префрлиле бебињата во 19 приватни болници каде наводно бебињата биле подложени на продолжени, а понекогаш и непотребни третмани. Најмалку 10 доенчиња, наводно, починале во изминатата година поради запоставување или невнимание во установи кои не биле подготвени да ги лекуваат.
Обвинителите на судењето, кое започна денеска во Истанбул, велат дека обвинетите, исто така, фалсификувале извештаи за да изгледаат посериозни состојбите на бебињата за да добијат исплати од институцијата за социјално осигурување.
Главните обвинети негираат дека сториле нешто лошо, инсистирајќи дека ги донеле најдобрите можни одлуки и се соочуваат со казна за неизбежните несакани последици.
Случајот, кој излезе во јавноста минатиот месец, предизвика гнев во јавноста и повика на посилен надзор над здравствениот систем. Оттогаш, властите ги укинаа лиценците и затворија девет од 19 болници вмешани во скандалот.
Д-р Фират Сари, главниот обвинет кој раководел со одделенијата за неонатална интензивна нега во неколку приватни болници во Истанбул, се соочува со затворска казна до 583 години. Тој се товари дека основал организација со цел кривично дело, измама на јавни институции, фалсификување службена исправа и убиство од небрежност.
Десетици демонстранти протестираа пред зградата на судот, извикувајќи: „Убијците на бебињата ќе одговараат“ и „Приватните болници треба да се затворат“.
Над 350 семејства поднеле претставки до обвинителите или други државни институции со кои бараат истрага за смртта на нивните најблиски, јавуваат државните медиуми.
Случајот доведе до повици за оставка на министерот за здравство Кемал Мемишоглу, кој беше директор за здравство во Истанбул во времето кога се случија некои од смртните случаи.