Украинското воено воздухопловство наскоро ќе биде посилно со пристигнувањето на француските ловци „Мираж-2000“, кои доаѓаат како дел од францускиот пакет воена помош, со што ќе се исполни ветувањето на францускиот претседател Макрон.
Првата серија на француски борбени авиони Мираж 2000-5 би требало да пристигне во Украина до 20 јануари 2025 година, според извештаите на францускиот „Авион Легендерс“.
Првичната серија се очекува да вклучува три до шест авиони, кои најверојатно ќе ја заменат старата флота на Украина од советски бомбардери „Су-24“.
Ловците Мираж „2000-5“, кои долго време беа столбот на француските воздушни и вселенски сили, дополнително беа опремени со напредни способности од страна на Францускиот генерален директорат за вооружување (ДГА). Дизајнирани првенствено како пресретнувачи, модифицираните ловци сега се опремени да носат и лансираат крстосувачки ракети, кои моментално се наоѓаат во арсеналот на Украина.
Договорот за авионот Мираж 2000-5 е резултат на долгорочните преговори меѓу францускиот претседател Емануел Макрон и украинскиот претседател Володимир Зеленски.
Авионот Мираж 2000-5Ф ќе се приклучи на растечката листа на западни авиони што се испорачуваат во Украина, вклучувајќи го и американскиот „F-16 Fighting Falcon“. Иако се помали и полесни од авионите „МиГ-29“ или „Су-27“ од советската ера, авионите „Мираж“ се многу маневрирачки и способни да изведуваат прецизни удари. Украинските пилоти, наводно, постојано ја фалеле агилноста и борбената ефикасност на овој авион за време на обуката.
Оваа испорака го означува и првиот борбен авион дизајниран и произведен од Европа кој ќе биде пренесен во Украина, по претходното пристигнување на американските „Ф-16“.