Привремениот претседател на Сирија, Ахмед ал-Шара, изјави дека неговата земја има „историска можност“ за обнова. Говорејќи на самитот за национален дијалог во Дамаск, Шара нагласи дека Сирија треба да се изгради самостојно, истакнувајќи дека сегашната можност е исклучителна и мора да се искористи во интерес на сирискиот народ, пренесува Ројтерс.
Тој, исто така, повика на обединување на различните вооружени групи под една воена команда, тврдејќи дека „силата на земјата лежи во нејзиното единство“.
На самитот учествуваа делегати поделени во шест работни групи, кои дискутираа за клучни прашања како што се транзициската правда, уставот, изградбата на државни институции, личните слободи, економскиот модел на земјата и улогата на граѓанското општество.
Целта на самитот е да се изнесат препораки кои ќе помогнат во обликувањето на уставната декларација и подготовката на основните принципи за новиот политички поредок во Сирија. Новата привремена влада треба да ја преземе власта на 1 март.
Иако процесот претставува поместување од претходното владеење на семејството Асад, критичарите укажаа на недостаток на инклузивност, наведувајќи дека малцинствата, како и курдските и други опозициски групи, не биле поканети на самитот, пренесува Танјуг.