Мета, матичната компанија на Инстаграм и Фејсбук, денеска упати извинување откако корисниците пријавија појава на голем број кратки видеа со насилна содржина, крвопролевање, злоупотреба на животни и мртви тела на Инстаграм.
На форумот за Инстаграм на платформата за онлајн дискусија Редит, корисниците пријавија дека наидувале на видеа од човек прегазен од слон, друг растргнат од хеликоптер и млад човек кој си истурил врело масло на лицето, пренесува „Гардијан“.
Неколку корисници објавија видеа од Инстаграм каде што на екранот се појавува предупредување за „чувствителна содржина“, кое ги информира корисниците за природата на видеото.
Списокот на насилна содржина на почетната страница на еден корисник вклучува човек кој гори, пукања, мртви тела и злоупотреба на животни.
„Во последните 24 часа, изгледа дека алгоритмот на Инстаграм полуде. Мојата почетна страница е преполна со насилни клипови, еден по друг“, рече еден корисник.
Портпаролот на Мета се извини и изјави дека грешката поради која овие видеа им биле препорачувани на корисниците е поправена, пренесува Танјуг.
Грешката се случила по неодамнешните промени во пристапот на Мета кон модерирање на содржината, но компанијата тврди дека овие видеа не се поврзани со новите промени.
Насоките за содржина на компанијата Мета наведуваат дека компанијата ќе отстрани содржина која е „особено насилна или графичка“ и дека некои слики ќе бидат заштитени со ознака „чувствителна содржина“.