Извозот на сурова нафта и гориво на Венецуела драстично падна во март, покажаа податоците за бродовите, како одраз на влијанието на објавувањето на секундарните американски царини врз купувачите и одложувањата и суспензии на испораката по откажувањето на работните дозволи во Венецуела.
Кабинетот на американскиот претседател Доналд Трамп минатата недела објави царини од 25 отсто за сите земји кои купуваат венецуелска сурова нафта и гас. Во исто време, Вашингтон ги информираше странските партнери на венецуелската државна нафтена компанија ПДВСА дека ќе ги одземе дозволите за нивните лиценци за работа и снабдување од Венецуела.
Вашингтон веќе ја суспендираше лиценцата на „Шеврон“ да произведува нафта во Венецуела и да ја извезува во САД, вториот најголем пазар за венецуелска нафта во 2024 година, по Кина.
Американското Министерство за финансии го одреди 27 мај како краен рок за компаниите да ги прекинат активностите во Венецуела и да извезуваат нејзина нафта.
По објавувањето на овие мерки, редовните купувачи на венецуелска сурова нафта во Кина и Индија ја прекинаа испораката на нафта што требаше да биде натоварена на бродовите на крајот на март и во април.
Во такви услови, од територијалните води на Венецуела во март отпловија вкупно 42 брода со 804.677 барели сурова нафта и гориво дневно и 341.000 тони нафтени нуспроизводи и петрохемиски производи, според податоците на ПДВСА и интерните документи.
Тоа значи дека извозот е намален за 11,5 отсто во однос на февруари.
Во однос на март минатата година, тој е намален во просек за 7,8 отсто во однос на истиот месец во 2024 година, лизгајќи се на најниското ниво од крајот на минатата година.
Кина беше и главната дестинација на венецуелската сурова нафта во март, со увезени 483.700 барели дневно. Следат САД со испорачани 210.700 барели дневно. На трето место, со значителна разлика е Индија со увезени 60.160 барели дневно, а блиску е Куба со 50.130 барели дневно.
Европа го прекина увозот
Во месецот што заврши, нафтата од Венецуела не отпатува во Европа, но некои европски партнери на венецуелската државна нафтена компанија планираат и ги товарат можеби последните барели пред крајниот рок за прекин на операциите, покажуваат документите.
Потпретседателката на Венецуела, Делси Родригез, во вторникот рече дека бројките објавени од Ројтерс се неточни и дека извозот на нафта се зголемил за 8,78 отсто во март, но не ги поткрепи тврдењата со докази или детали, според „Ројтерс“.
Владата на претседателот Николас Мадуро во принцип ги отфрла санкциите на САД и другите земји, велејќи дека тие се нелегитимни мерки кои претставуваат „економска војна“ и треба да ја парализираат Венецуела.
Поради зголемениот притисок од Вашингтон, два брода од Венецуела испловија празни од февруари. Други танкери чекаат надвор од пристаништата во Венецуела со недели, дури и откако добија дозвола од „PDVSA“ да се товарат, бидејќи многу купувачи и сопственици на бродови го чекаат почетокот на спроведувањето на секундарните американски царини.
Повеќе од 80 бродови, вклучително и 35 со товар, се видени деновиве во или во близина на водите на Венецуела, но не заминаа, според сателитски снимки анализирани од службата за следење „Tankertrackers.com“.
Венецуела би можела да најде нови начини за испорака на нафта во Азија, преку трети земји и претовар на море, како што правеше во изминатите години, заедно со другите производители на нафта под санкции, забележува „Ројтерс“.