Германија е сопственик на второто најголемо количество злато во светот, а дури 37 отсто од тие резерви, вредни 113 милијарди евра, се складирани во трезорите на Федералните резерви на Њујорк. Таа европска земја, која одамна е позната по својата развиена економија и финансиска стабилност, може да биде уверена дека, доколку се појави потреба, 1.236 тони злато складирани таму лесно може да се заменат за американски долари или некоја друга сигурна валута. За прв пат од 1945 година, некои германски политичари сериозно се прашуваат дали нивното злато е безбедно таму.
САД долго време беа сигурен сојузник, но сега политичките тензии растат, а германската влада се соочува со американско раководство кое сака да ja ослабне. Американските политичари отворено ја критикуваат, заменикот на Доналд Трамп ја нарекува „патетично бескорисна“, а извештаите зборуваат за мешање во германските избори за поддршка на крајната десница, пишува „Politico“. Поради ова, сега се доведени во прашање дури и навидум безбедните аспекти како резервите на злато, особено откако претседателот Трамп презеде радикални чекори во обид да ги помести границите на неговата извршна моќ.
Германскиот политичар Марко Вандервиц од Христијанско-демократската унија (ЦДУ) е еден од оние кои изразуваат загриженост за безбедноста на тие златни резерви. Уште во 2012 година, Вандервиц повика на проверка на германските резерви на злато во САД за да се осигура нивната безбедност. Тој веруваше дека Бундесбанката треба или поактивно да го чува златото или да го врати на Германија.
„Официјалните претставници на Бундесбанк мора лично да ги бројат златните полуги и да ги документираат резултатите“, изјави неодамна за Билд неговиот сопартиец и пратеник во Европскиот парламент Маркус Фербер.
И германската централна банка, Бундесбанк, многу сериозно го сфаќа прашањето за безбедноста на нејзините златни резерви. Сепак, директорот на Бундесбанк, Јоаким Нагел, неодамна за време на прес-конференција ја увери јавноста дека сè уште имаат „сигурен партнер“ за складирање на германското злато во Њујорк.
„Тоа не ме држи буден во текот на ноќта“, нагласи Нагел, изразувајќи целосна доверба во справувањето со оваа проблематика од страна на американската централна банка.
Финансиската историја на Германија покажува дека загриженоста за резервите на злато порано не била лесно отфрлена. Уште во 2013 година, како резултат на растечкото популистичко расположение, кампањата предводена од десничарските популисти (и која силно одекна во јавноста) ја принуди Бундесбанката да ги врати сите свои златни резерви складирани во трезорите на Банката на Франција во Германија. Во тоа време, Бундесбанк го оправда потегот со тврдењето дека бидејќи Германија и Франција го делат еврото, повеќе не е неопходно да се чува злато во Париз. Затоа денес повеќе од половина од златните резерви на Бундесбанката се складирани во Франкфурт, а само мал процент останува во Банката на Англија.