Претседателот на ентитетот на РС, Милорад Додик, уште еднаш даде отворена поддршка за руската агресија врз Украина, оправдувајќи ја бруталната инвазија со тврдења за закани по руските интереси и наводни злосторства против Русите во Украина.
„Во Украина им го забранија јазикот, азбуката, ја ограбија црквата… Во Одеса убија значителен број Руси, а не сакаа да ги гонат криминалците. Што требаше да прави Русија? Да дојдат во Москва? Се разбира, оправдано е што го направија тоа и дека под водство на генијален лидер Путин“, изјави Путин.
На манир на руските пропагандисти, Додик секојдневно се обидуваше да ги релативизира фактите за воените злосторства извршени од руските сили во Украина. И покрај бројните извештаи на меѓународните организации за цивилни жртви, масовни депортации и уништување на инфраструктурата, претседателот на ентитетот на РС одлучно ја негира реалноста, пишува Кликс.ба.
Во исто време, Додик ја критикуваше поранешната германска канцеларка Ангела Меркел за нејзината изјава дека Договорот од Минск е обид да се купи време за Украина.
„И тогаш се поставува прашањето што сакаа да му направат на Путин и што имаат против Русија. Зошто не ја прифаќаат Русија таква каква што е“.
Ваквите изјави доаѓаат во време кога меѓународната заедница се повеќе се свртува кон санкционирање на оние кои отворено застануваат на страната на агресорот. Додик, сепак, продолжува да игра на картата на отворена проруска ориентација, без оглед на тоа што дополнително ја изолира и дестабилизира Босна и Херцеговина.