Намалувањето на средствата за итна помош во храна може да резултира со „смртна казна“ за милиони луѓе, предупреди во вторникот Светската програма за храна на Обединетите нации (WFP).
Организацијата соопшти дека е длабоко загрижена од неодамнешните најави од Соединетите Држави дека ја прекинале итната помош во храна за 14 земји.
„Ако се спроведе, тоа може да значи смртна казна за милиони луѓе кои се соочуваат со екстремен глад и смрт“, напиша организацијата на „X“.
„WFP“ беше во контакт со американската администрација за да „побара појаснување и да поттикне континуирана поддршка за овие програми за спасување животи“.
Извршната директорка Синди Мекејн ги повика светските лидери да ги „мерат последиците“ од намалувањето на помошта.
„Постојаните намалувања на операциите за итни случаи на „WFP“ ќе го продлабочат гладот, ќе ја поттикнат нестабилноста и ќе го направат светот далеку помалку безбеден“, напиша таа на X. „Со порастот на конфликтот и екстремниот глад, задржувањето на помошта не само што одзема животи туку и ја поткопува глобалната стабилност“, посочи таа.
САД беа најголемиот донатор на „WFP“ во 2024 година, со 4,5 милијарди долари.
Меѓутоа, за време на претседателот Доналд Трамп, САД ги намалија трошоците за меѓународна хуманитарна помош. На почетокот на февруари, владата започна со распуштање на агенцијата за развој УСАИД и затвори бројни програми.