Тим научници мапирал вкупно 3.350 буриња радиоактивен отпад потонати на дното на североисточниот Атлантик во текот на еден месец, иако не се откриени високи нивоа на радиоактивност, објавија научниците денес по враќањето во Брест.
Мисијата, спроведена од бродот „Аталант“ на француската океанографска флота, се викала NODSSUM, а нејзината цел била да се мапира главната зона на потонување на илјадници буриња радиоактивен отпад што европските земји ги фрлиле помеѓу 1946 и 1993 година, објавува „TV5 Monde“.
Во тоа време, фрлањето во море се сметало за вообичаено решение за управување со отпадот од нуклеарната индустрија.
Мисијата истражувала прецизно дефинирана област во меѓународни води, околу 1.000 км југозападно од Брест и 650 км северозападно од А Коруња, Шпанија.
Научниците користеле сонар со висока резолуција монтиран на автономната подморница „Улис“, која ја извршила својата прва научна мисија во оваа пригода.
За време на 16 нуркања, „Улис“ успеа да мапира 3.350 буриња на површина од 163 квадратни километри.
Околу педесет буриња беа фотографирани во различни состојби на зачувување, а површините покажаа знаци на корозија и беа обраснати со морски анемони.
На некои од бурињата беа забележани протекувања на непозната супстанца, веројатно битумен.
Инструментите за мерење на радиоактивност регистрираа вредности слични на природното позадинско зрачење.
Попрецизни лабораториски анализи на примероци од седименти, вода и риби ќе бидат извршени во наредните месеци.
Тимот беше составен од истражувачи од CNRS, Институтот за развојни истражувања (IRD), Универзитетот во Берген, Норвешка, Институтот Тунен, Германија и Меморијалниот универзитет во Њуфаундленд, Канада.
До 1993 година, неколку европски земји фрлиле повеќе од 200.000 буриња радиоактивен отпад во бездната рамнина на североисточниот Атлантик, во меѓународни води, на длабочина поголема од 4.000 метри, пренесува Танјуг.