Истрагата на Обединетите нации откри дека депортацијата и трансферот на украински деца од страна на руските власти по инвазијата на Москва во Украина во 2022 година претставуваат злосторства против човештвото.
„Во овој извештај, Комисијата заклучи дека злосторствата против човештвото и воените злосторства од страна на руските власти ги таргетирале децата, некои од најранливите жртви. Овие злосторства имале трајни последици по нивните животи и иднина“, според извештајот, кој ќе биде презентиран пред Советот за човекови права на ООН (УНХЦР) во Женева задутре.
Независната меѓународна комисија за истрага за извештајот на Украина ги испита случаите на 1.205 деца од пет украински региони и откри дека 80 проценти од нив сè уште не се вратиле во својата татковина.
Украинските власти тврдат дека Русија незаконски депортирала или насилно префрлила повеќе од 19.500 деца во Русија или Белорусија, кршејќи ги Женевските конвенции. Минатогодишното истражување, финансирано од САД, покажа дека Русија ги проширила своите програми за превоспитување на депортирани деца.
„Депортации и преселби се случија на различни локации низ поширока географска област во делови од Украина под руска окупација откако беа забележани редовни обрасци на однесување. Ова укажува дека станува збор за систематски и широко распространети дејствија“, се истакнува во извештајот.
Русија негира дека киднапирала деца против нивна волја и тврди дека ги евакуирала луѓето кои го побарале тоа за да ги отстрани од воената зона.