Најсушната зима во Сирија во последните седум децении предизвика сериозна криза со водата во Дамаск и делови од Сирија.
Изворот на реката Барада Аин ал-Фиџе е главен извор на вода за околу пет милиони луѓе и ги снабдува Дамаск и неговите предградија со 70 проценти од проточната вода. Вообичаено за време на зимската сезона на поплави има многу вода, но сега, по најсушната зима во последниве децении, има малку вода.
Со оглед на тоа што сирискиот главен град е погоден од најлошиот недостиг на вода во последниве децении, многу луѓе сега ја снабдуваат со вода од приватни цистерни кои се полнат од бунари.
Службениците предупредуваат дека ситуацијата би можела да се влоши во текот на летото и ги повикуваат жителите да користат вода штедливо при туширање, чистење или миење садови.
„Изворот на Аин ал-Фиџе сега е на најниско ниво“, рече Ахмад Дарвиш, раководител на Управата за водоснабдување на градот Дамаск, додавајќи дека тековната година е забележана најмала количина на врнежи од дожд од 1956 година.
Каналите за наводнување што се користеле уште од римско време пред два милениума биле обновени во 1920 година и повторно во 1980 година.
Дарвиш рече дека водата за Дамаск доаѓа главно од врнежи од дожд и топење на снегот од планините долж границата со Либан, но поради овогодишните врнежи од дожд кои се под просекот, „имаме многу помалку вода од вообичаеното“.
Во источниот дел на Дамаск, во населбата Абасиди, постојаните прекини на електричната енергија го влошуваат проблемот, бидејќи понекогаш жителите имаат вода, но немаат електрична енергија за да ја пумпаат до резервоарите на покривот на зградата.
Еден локален жител рече дека се плаши оти водоснабдувањето ќе се влоши уште повеќе во текот на летото. Тој веќе штеди.
„Луѓето во Дамаск се навикнати да имаат вода секој ден и да пијат вода од чешма што доаѓа од изворот Аин ал-Фиџе, но за жал, изворот сега е слаб“, рече тој.
За време на 14-годишната граѓанска војна во Сирија, Аин ел-Фиџа беше изложена на постојано гранатирање, од страна на силите на тогашниот претседател Башар ал-Асад, како и од страна на бунтовниците. На почетокот на 2017 година, владините сили ја освоија областа од бунтовниците и ја држеа до минатиот декември, кога Асад падна од власт.
„Изворот на Аин ал-Фиџе е животна артерија на Дамаск“, рече друг локален жител додека се во тек работите за обнова на ресторанот, кој издржувал 15 семејства во областа за живот.
„Сега изгледа како пустина. Таму нема никој“, рече тој. „Се надевам дека ќе се вратат старите добри времиња и дека луѓето ќе дојдат тука.“