– Соединетите Држави се воздржани од изјавата на членките на Светската трговска организација (СТО) со која се осудува руската агресија во Украина, соопштија денеска дипломатски и трговски извори.
Ова е првпат САД да не ја поддржат изјавата, која се објавува секоја година од почетокот на војната во Украина во февруари 2022 година, што е уште еден сигнал за драстична промена во односите меѓу Вашингтон и Москва, објави Ројтерс.
Покрај Украина, изјавата ја потпишаа и 44 членки на СТО, меѓу кои Европската унија, Велика Британија, Канада и Австралија.
Во соопштението се осудува „погубното влијание на руската инвазија на Украина врз животите на луѓето и економијата на таа земја“.
„Сериозно сме загрижени за уништувањето на Украина, што исто така има последици за глобалната трговија, особено во однос на понудата на меѓународните пазари“, соопшти СТО.
Кога станува збор за снабдување на светските пазари, во соопштението се истакнуваат голем број стратешки важни украински производи, пред се земјоделски и прехранбени производи, како и ѓубрива и минерали.
Украина денеска ја помина контролота на СТО, чија цел е да се подобри транспарентноста и усогласеноста со трговските правила меѓу членките на организацијата.
Советот за безбедност на Обединетите нации во понеделникот усвои резолуција на Соединетите држави со која зазема неутрален став за конфликтот во Украина, дополнително нагласувајќи ја впечатливата промена во позицијата на Вашингтон откако претседателот Доналд Трамп ја презеде функцијата во јануари, пренесува Танјуг.
Украинскиот претседател Володимир Зеленски денеска изјави дека Киев и Вашингтон го дефинирале првичниот договор за располагање со наоѓалиштата на минерали во Украина.
Договорот е постигнат како дел од напорите на Киев да ја добие поддршката на Трамп, бидејќи американскиот претседател се обидува да го исполни предизборното ветување и да стави крај на војната меѓу Украина и Русија што е можно побрзо, што, како што стравуваат поддржувачите на Украина, може да биде штетно за нејзините национални интереси, наведува „Ројтерс“.