Австрија се соочува со најголемиот шпионски скандал во последните децении. Апсењето на поранешен разузнавач открива докази за голема руска инфилтрација, слаб официјален надзор и однесување достојно за шпионски роман.
Егисто От беше уапсен на 29 март. Во налогот за апсење од 86 страници, до кој дојде Асошиејтед прес, меѓу другото се наведува дека тој им дал на руските разузнавачи телефонски податоци на поранешни високи австриски функционери, помогнал да се планира упад во станот на познат новинар и напишал „предлози за подобрување“ по убиството нарачано од Русите во Германија, пренесува Асошиејтед прес.
От е осомничен дека му дал чувствителни информации на Јан Марсалек, австриски бегалец баран поради сомнение дека ја измамил германската компанија за плаќања Wirecard во 2020 година, каде што бил главен оперативен директор.
Во налогот се наведува дека пораките за разговор обезбедени од британските власти го поврзуваат Марсалек со руската разузнавачка агенција FBS.
Томас Риглер, историчар и експерт за шпионажа од Австрискиот центар за разузнавање, пропаганда и студии за безбедност, рече дека случајот има „потенцијал за една од најголемите приказни за шпионажа во поновата австриска историја“.
Според до Асошиетед прес Австрија, која за време на Студената војна се наоѓаше покрај Железната завеса и долго време имаше добри односи со Москва, е членка на Европската унија со политика на воена неутралност, но и долгогодишна репутација на шпионски центар.
Отплеткување на пајаковата мрежа
От, поранешен полицаец, беше разузнавач во Турција и Италија од 2001 до 2012 година пред да продолжи да раководи со тајните агенти во сега веќе непостоечката домашна разузнавачка агенција на Австрија БВТ.
Тој беше суспендиран од БВТ во 2017 година кога првпат се појавија обвинувања дека можеби шпионирал за Русија, но следната година беше префрлен да работи за австриската полициска академија.
Во 2021 година, тој беше суспендиран за време на истрагата за неговите наводни врски со Русија и одведен во притвор. Властите одлучија дека има премалку докази и го ослободија околу четири недели подоцна.
От служел во БВТ под водство на Мартин Вајс, поранешен шеф на австриските разузнавачки операции.
Во налогот за апсење се наведува дека Вајс почнал да работи за Марсалек и компанијата Wirecard откако ја напуштил разузнавачката агенција во 2018 година и дека на Ота му ги пренел наредбите на Марсалек и руските оперативци.
Додека обвинението дека От барал информации за Русија првпат се појави во 2017 година, британското разузнавање неодамна и достави на Австрија значајни нови информации, пишува АП.
Петмина бугарски државјани кои наводно работеле како дел од мрежата со Марсалек беа уапсени во Британија минатата година, а уште еден во февруари.
От, наводно, ги добил и мобилните телефони на тројца поранешни високи функционери на австрискиот министер за внатрешни работи, вклучувајќи го и шефот на кабинетот на поранешниот министер, кога ИТ експертите на БВТ требало да ги поправат откако паднале во вода за време на патување со брод на Дунав во 2017 година.
Според обвинителите От, исто така, наводно му помогнал на Марсалек да прошверцува украден компјутер СИНА, уред што го користат многу европски влади за пренос на доверливи информации, во Москва. По предавањето во истиот стан во Виена, Марсалек во порака напишал дека уредот бил успешно пренесен во Лубјанка – каде што е седиштето на ФСБ во Москва.
От останува во притвор во очекување на одлуката дали ќе биде официјално обвинет, што најверојатно ќе потрае.
Австрискиот канцелар Карл Нехамер свика состанок на Советот за национална безбедност за вторник и рече дека земјата мора да ја зајакне својата безбедност за да спречи руска инфилтрација.