Светскиот поредок се соочува со закана каква што од Студента војна досега немало, предупредија шефовите на контраразузнавањето на САД и Велика Британија.
Шефовите на ЦИА, Вилијам Барнс и на МИ6, Ричард Мур, за првпат се појавија заедно и изјавија дека двете земји ги здружиле силите и упорно се борат против „агресивната Русија и агресивната војна во Украина“.
Барнс и Мур во првиот заеднички напис во историјата, како што пренесе „Фајненшл тајмс“, објавија дека ја предвиделе војната во Украина и дека успеале да ја предупредат и меѓународната заедница, со делумна декласификација на тајните информации, за да му помогнат на Киев.
Тие информираа и дека работат на спречување на „непромислена кампања за саботажа“ од Русија низ Европа, на смирување на конфликтот меѓу Израел и Хамас и на борба со тероризмот за да се спречи обновувањето на Исламската држава.
Во својот коментар за „Фајненшл тајмс“, двајца разузнавачи соопштија дека „нема сомнеж дека меѓународниот поредок – балансиран систем што доведе до релативен мир и стабилност и овозможи зголемување на животниот стандард и просперитет е под закана на начин што се уште не се гледа. Уште од Студената војна основата на борбата против овој ризик се посебните односи меѓу Обединетото Кралство и САД“.
Постои реален ризик од потенцијална употреба на Русија на тактичко нуклеарно оружје како одговор на неуспесите на бојното поле. Барнс додаде дека дури и кога заговорите изгледаат аматерски, тие можат да бидат непромислени и опасни.
Покрај војната во Украина, двете служби заедно работат и против непромислената кампања за саботажа низ Европа, предводена од руското разузнавање и нејзината цинична употреба на технологијата за ширење лаги и дезинформации, пренесе „Фајненшл тајмс“.
ЦИА и МИ6 го гледаат подемот на Кина како главен разузнавачки и геополитички предизвик на векот. Тие ги реорганизираа своите активности „за да се фокусираат на тој приоритет“.
Тие, исто така, рекоа дека силно вршат притисок за деескалација на Блискиот Исток и без престан работеле за прекин на огнот и ослободување на заложниците.