Научниците на Европската вселенска агенција (ESA) во соработка со Лего направија 3Д коцки од вселенска прашина. Материјалот и начинот на кој се составуваат лего коцките еден ден би можеле да помогнат во решавањето на проблемот со изградбата на градби на Месечината, како засолништа за астронаутите, пишува „Astronomy“.
„Никој никогаш не изградил било каква градба на Месечината, па мораме да откриеме не само како да ги градиме, туку и од што ги градиме. Не можеме да носиме никакви материјали со нас“, вели Ејден Каули, научник во Европската вселенска агенција.
Единствениот недопрен лунарен материјал моментално на Земјата е 382 килограми карпи и реголит собрани од астронаутите на Аполо и грст материјал од мисии за враќање на роботски примероци. Наместо тоа, тимовите користеа материјал од метеорит стар 4,5 милијарди години – NWA 869, кој беше пронајден во северозападна Африка во 2000 година.
Тие би можеле да се користат за изградба на лунарни бази
Метеоритот содржи метални зрна, хондрили и други елементи, а научниците го сомелеле во прав и го измешале со симулиран реголит. Тимот потоа го искористил материјалот за да направи 3Д печатени лего коцки, што докажува дека меѓусебно поврзаните коцки може да се произведуваат и на Месечината од реголит и да се користат за изградба на лунарни бази.
Според Лего, метеоритските блокови се склопуваат и се редат исто како пластичните, а до септември заинтересираните ќе можат да ги видат изложени во одбрани бренд-продавници ширум светот.