Извршниот директор на „Фолксваген“, Херберт Дис, изјави дека евентуалната победа на Џо Бајден на претседателските избори во САД подобро ќе одговара на напорите на германскиот производител за масовно производство на електрични автомобили низ целиот свет.
„Програмата на Демократите би била повеќе во согласност со нашата меѓународна стратегија за борба против климатските промени со тоа што ќе станеме електрични“, рече Дис за време на виртуелниот настан на Блумберг.
Сепак, тој истакна дека компанијата изгради доверба со администрацијата на Доналд Трамп.
„Направивме многу за да помогнеме во градењето на Америка“, рече тој.
„Фолксваген“ планира да ја изгради најголемата линија за производство на електрични автомобили во светот, која исто така вклучува производство на батерии и кросовери ID.4 во својот погонски комплекс во американската држава Тенеси.
„На крајот на краиштата, ова е одлука што Америка мора да ја донесе“, рече Дис за изборите.
„Можеме само да набудуваме и ќе мора да се прилагодиме“, додаде тој.
Дис, исто така, вети брза транзиција кон електрични автомобили, што според него е прашање на опстанок, бидејќи пандемијата на коронавирус ризикува да го сврти бизнисот наопаку на краток рок.
И покрај силните нарачки, најголемиот производител на автомобили во светот сподели дека неговиот развој во наредните месеци ќе зависи од тоа како водечките економии ќе успеат да ја контролираат болеста и дали ќе можат да избегнат наметнување ограничувања што ќе наштетат на побарувачката. И покрај неизвесноста, „Фолксваген“ планира да направи агресивни инвестиции во нови технологии со цел да не заостанува зад основните промени во автомобилската индустрија.
„Ако не сте доволно брзи, нема да преживеете“, рече Дис. „На долг рок, климатските промени ќе бидат најголемиот предизвик со кој ќе се соочи човештвото“, рече тој.