Агенцијата за лекови и медицински помагала на Босна и Херцеговина одобри употреба на руската вакцина против коронавирус Спутник V, а според директорот на Институтот за јавно здравје на Република Српска, Бранислав Жељковиќ, вакцинацијата може да започне на крајот на оваа или почетокот на следната недела, објави Радио-телевизија Република Српска.
Република Српска увезе 2.000 дози вакцина Спутник V.
„Во моментот кога ќе ги добиеме наодите за контролата на сериите, имаме можност да дистрибуираме вакцини до здравствените установи. Во зависност од интересите на здравствените работници, одредената количина на вакцини ќе се дистрибуира во тие институции и на тој начин ќе започне вакцинацијата“, рече Жељковиќ.
Министерот за здравство на РС, Ален Шераниќ претходно изјави дека се очекуваат 200.000 дози вакцини Спутник V за 100 000 луѓе во втората половина на февруари и иста количина до средината на март, а се очекуваат и првите количини вакцини од механизмот Ковакс за Босна и Херцеговина во февруари.