Германија возврати со иста мерка откако нејзиниот дипломат беше протеран од Русија. Ставот на Кремљ кон Навални и сузбивањето на протестите ги наруши односите со ЕУ, а се верува дека само заедничкиот гасовод ги штити од целосно нарушување.
Руски дипломат е прогласен за непожелен и повикан да ја напушти Германија, потврди во понеделникот Министерството за надворешни работи во Берлин. Потегот беше координиран со Полска и Шведска – кои го сторија истото – како и со Европската служба за надворешни работи.
Тоа е реципрочен одговор на потегот на Москва кој во петокот повика тројца дипломати да ја напуштат земјата – по еден од Германија, Полска и Шведска. Тие се обвинети за „учество“ во непријавените демонстрации против апсењето на опозицискиот лидер Алексеј Навални на 23 јануари.
Уште во петокот, канцеларката Ангела Меркел ја нарече одлуката на Кремљ „неоправдана“ и нов пример дека Русија е далеку од владеењето на правото.
Берлин тврди дека германскиот дипломат бил „законски информиран за настаните на самото место“ во согласност со Виенската конвенција.
Обвинувања од враќањето на Навални
Навални беше уапсен во јануари веднаш по враќањето од Берлин, каде се лекуваше по труењето, за што ги обвинува руските служби. Минатиот вторник, тој беше осуден на неколку години затвор бидејќи наводно ја прекршил претходната условна казна. Кога неговиот претходен домашен притвор ќе биде одбиен, неговите адвокати пресметуваат дека Навални ќе мора да помине две години и осум месеци во затвор.
Водечката руска опозиција пресудата ја нарече политичка и го обвини рускиот претседател Владимир Путин дека лично стои зад обидот за атентат. Кремљ негира каква било вмешаност во нападот на Навални.
Полицијата остро реагираше на протестите во Москва и другите градови. Според опозицијата, во последните неколку недели се уапсени околу десет илјади лица. Навални од затворот достави порака, објавена на Инстаграм, во која ги повика приврзаниците да не протестираат повеќе и „да останат на слобода“.
Филм објавен на Интернет од Навални, во кој се гледа вила на Црното Море, која наводно му припаѓала на Владимир Путин, крева прашина од крајот на јануари. Видеото има повеќе од сто милиони прегледи.
Во анкетата на независниот центар Левада, повеќе од една четвртина од руските граѓани изјавиле дека го гледале видеото, додека други 42% барем слушнале за тоа, со 17% дека имаат полошо мислење за Путин по гледањето на видеото.
Кремљ тврди дека ова е измама од Навални и дека рускиот претседател нема никаква луксузна вила. Две недели по објавувањето на видеото, милијардерот Аркадиј Ротенберг, пријател од детството на Путин, рече дека вилата му припаѓа нему.
Колку поделби има ЕУ?
Затворската казна на Навални и апсењето на демонстрантите ги стави односите на Русија и ЕУ повторно на тест. Според германскиот весник „Ханделсблат“, завладеа „ново ледено доба“.
Во коментарот на швајцарскиот „Neue Zürcher Zeitung“, посебно внимание се посветува на понижувањето што го доживеа високиот претставник на ЕУ, Жозеп Борел, во петокот во Москва. За време на состанокот со рускиот министер за надворешни работи Сергеј Лавров преку Твитер дознал дека Москва протерала тројца европски дипломати.
„Колку поделби има папата?“, наводно, Сталин прашал за моќта на Ватикан. А колку има во ЕУ?, може да праша Лавров денес. Која моќ стои зад сојузот на државите претставени од Борел? Одговорот е јасен. Ако нема единство барем кај големите членови, Европската комисија е надворешно политички тигар од хартија“, пишува весникот.
Тука е и изградбата на гасоводот „Северен поток 2“, кој директно ќе ги поврзе Русија и Германија, доколку заврши. Досега Берлин се спротивстави на санкциите на Вашингтон и на протестите на некои членки на ЕУ кои бараа прекин на изградбата. Германскиот министер за економија неодамна го нарече гасоводот економски потфат што не треба да се „меша“ со темата Алексеј Навални. Слична изјава даде и канцеларката Ангела Меркел.
Во исто време, се повеќе германски политичари се изјаснија за можно производство на руската вакцина Спутник V во Германија, доколку биде одобрена од Европската агенција за лекови. Официјален Берлин, како и остатокот од ЕУ, е мета на критики поради бавната вакцинација.
Прашањето, сепак, е дали спиралата на дипломатски мерки и одмазда запре во понеделникот со протерувањето на тројца руски дипломати, бидејќи, амбасадата на Руската Федерација во Берлин објави дека ваквите чекори „ќе продолжат да добиваат соодветни и реципрочни одговори“.