Иран веднаш ќе ги смени своите дејствија во својата нуклеарна програма по укинувањето на американските санкции, изјави денеска министерот за надворешни работи Мохамад Џавад Зариф, ладно реагирајќи на првичната понуда на Вашингтон за заживување на разговорите со Техеран со цел обновување на нуклеарниот договор од 2015 година, пренесува „Ројтерс“ .
Администрацијата на претседателот Џо Бајден објави дека е подготвена да разговара со Иран за враќање на таа земја во договорот, чија цел е да го спречи Техеран да набави нуклеарно оружје со укинувањето на повеќето меѓународни санкции, потсетува агенцијата.
„Кога санкциите ќе бидат укинати, ние веднаш ќе ги смениме сите корективни мерки. Едноставно е“, напиша Зариф на Твитер.
Техеран и Вашингтон се судрија околу тоа кој треба да го направи првиот чекор за заживување на договорот. Иран вели дека САД прво мора да ги укинат санкциите на Трамп, додека Вашингтон вели дека Техеран прво мора да постапи во согласност со договорот.
Дополнителен притисок доаѓа од законот усвоен од иранскиот парламент кој го обврзува Техеран да го укине на 23 февруари сеопфатниот пристап што им беше даден на инспекторите на ОН според договорот од 2015 година, ограничувајќи ги нивните посети само на прогласените нуклеарни локации.