Најмалку 430 мигранти вчера го преминаа Ла Манш на пат кон Велика Британија. Ова го покажуваат податоците на британското Министерство за внатрешни работи, поставувајќи нов 24-часовен рекорд, додека парламентот проучува проект за построги мерки во системот за азил што го спроведува Лондон, пренесе „АФП“.
Претходниот дневен рекорд, од септември 2020 година, изнесува 416 мигранти, потсетува британската новинска агенција „ПА“.
Според „Би-Би-Си“, скоро 8.000 луѓе со околу 345 бродови пристигнале на брегот на Англија од почетокот на годината, и покрај ветувањата на британската влада дека ќе ја направи миграциската рута неупотреблива и ја повикува Франција да ја засили борбата против овие патувања .
Според мајорот Дан О Махони, кој ја води борбата против „незаконската закана“ во Ла Манш, има „неприфатливо зголемување на премините на теснецот од страна на малите бродови, поради зголемувањето на илегалната имиграција во Европа“.
„Луѓето треба да побараат засолниште во првата безбедна земја каде што пристигнуваат и да не ги ризикуваат своите животи со овие опасни патувања низ Ла Манш. Ние продолжуваме да ги гониме криминалците што стојат зад овие нелегални патувања“, рече тој во коминике.
Во меѓувреме, британските законодавци го испитуваат нацрт-законот на министерот за внатрешни работи Прити Пател оваа недела за реформа на системот за азил.
Претставена од неа како „фер, но строга“, но критикувана од организациите за човекови права, реформата има за цел да ја обесхрабри илегалната имиграција и предвидува поинаку да се третираат барателите на азил во зависност од тоа дали тие легално пристигнале во земјата или не.
За време на дебатите во долниот дом, Тереза Меј, поранешен премиер и поранешен министер за внатрешни работи, зборуваше негативно за идејата за испраќање на азиланти во центри надвор од кралството, додека нивните апликации се разгледуваат.
Предлог-законот предвидува зголемување на максималната казна затвор од шест месеци на четири години за мигрантите кои ќе изберат да влезат во земјата илегално, и доживотен затвор – максимална казна за трговците со луѓе, откако сега е 14 години.