По неколку години избегнување на одговор на тоа прашање, германската канцеларка Ангела Меркел сега зазеде јасен став за феминизмот во последните денови на власт, пишува „Дојче веле“.
Нејзините коментари следеа за време на настан со нигериската писателка и феминистичка икона Чимаманда Нгози Адичи.
Во минатото, германската канцеларка можеби се двоумеше да се нарече себеси феминистка, но како што истакнуваат нејзините последни денови на функцијата, изгледа не се двоуми да го каже својот став поотворено за ова прашање.
Обраќајќи им се на новинарите по настаните со нигериската писателка во средата во Диселдорф, Меркел зборуваше за нејзиниот нов поглед на феминизмот.
– Во суштина, станува збор за фактот дека мажите и жените се еднакви, во однос на учеството во општеството и воопшто во животот. И во таа смисла, можам да кажам, да, јас сум феминистка – рече Меркел.
Тој коментар означува пресврт во однос на незгодниот разговор на самитот „Women20“ во Берлин во 2017 година, кога Меркел беше директно запрашана дали е феминистка.
Во тоа време, Меркел не одговори директно на прашањето, што предизвика критики и разочарување кај многумина.
На настанот во средата, германската канцеларка беше поискрена и го призна нејзиниот воздржан пристап од минатото.
– Бев посрамежлива тогаш кога го кажав тоа. Но, сега е добро размислено. И во таа смисла, можам да кажам дека сите треба да бидеме феминистки – заклучи Меркел.