Берзанските индекси на Волстрит паднаа во понеделникот, по нестабилното тргување, бидејќи инвеститорите се нервозни пред почетокот на сезоната на деловни извештаи на компании за третиот квартал.
Dow Jones се лизна за 250 поени, или 0,72 отсто, на 34.496 поени, S&P 500 падна за 0,69 отсто, на 4.361 поен, додека индексот Nasdaq се намали за 0,64 отсто, на 14.486 поени.
На самиот почеток на тргувањето, овие индекси се зголемија, но во вториот дел од тргувањето тие ги загубија тие добивки и го завршија тргувањето во минус.
Според „Хина“, инвеститорите се претпазливи пред сезоната на објавување на квартални деловни резултати на компаниите, која започнува во среда со објавување на финансискиот извештај на банката JPMorgan.
Аналитичарите во анкетата на Ројтерс проценуваат дека приходите на компаниите и банките од индексот S&P 500 пораснале за 29,6 проценти во третиот квартал во споредба со истиот период минатата година.
Кога станува збор за заработувачката, овој квартал треба да биде „силен“, но инвеститорите се плашат дека зголемената инфлација, високите цени на енергијата и нарушувањата во синџирите на снабдување ги зголемија деловните трошоци и негативно влијаеа на резултатите на компаниите.
„Пазарот е претпазлив за влез во сезоната на деловни резултати. Прекршувањата во системот за набавки може да влијаат на приходите на многу компании и одредени индустрии повеќе од другите“, рече Тим Гриски, стратег во Inverness Counsel.
Има и аналитичари кои се пооптимистични.
„Ако сте поголема компанија, можете да ублажите многу од овие проблеми. Раководствата се многу одговорни за нивниот буџет и не жртвуваат маржи“, рече Кристофер Харви, директор во Wells Fargo Securities, додавајќи дека побарувачката останува силна.
И на повеќето европски берзи, цените на акциите вчера пораснаа.
Лондонскиот индекс FTSE зајакна 0,72 проценти, на 7.146 поени, а францускиот CAC 0,16 проценти, на 6.570 поени. Франкфуртски DAX, пак, ослабна за 0,05 проценти, на 15.199 поени.