Полскиот премиер Матеуш Моравиецки во четвртокот во Брисел рече дека е отворен за дијалог со своите европски колеги за владеење на правото, но дека неговата влада не се согласува на уцени.
Една од темите на самитот на лидерите на ЕУ што почнува во четврток попладне е прашањето за владеењето на правото во светло на неодамнешната одлука на полскиот уставен суд со која се доведе во прашање надмоќта на европското право над националното право.
„Отворени сме за дијалог, но не се согласуваме за уцена“, рече Моравиецки при пристигнувањето на самитот, додавајќи дека неговата влада веќе претставила некои планови за повлекување на некои реформи за отстранување на приговорите на Судот на ЕУ.
Полската влада вети дека ќе го распушти Дисциплинскиот совет, кој според одлуката на Судот на правдата на ЕУ ја загрозува независноста на судиите.
Тој, исто така, ја бранеше одлуката на полскиот Уставен суд, тврдејќи дека таа се однесува само на оние области во кои ЕУ нема јурисдикција, истакнувајќи дека Судот на ЕУ се обидува да носи одлуки во области за кои нема јурисдикција.
Унгарскиот премиер Виктор Орбан застана во одбрана на Полска и рече дека ова е „лов на вештерки“.
„Ова е лов на вештерки против Полска. Варшава е во право “, рече Орбан, повторувајќи го ставот на Полска дека европското право има предност само во областите што земјите-членки ги оставаат на заедничките институции.
„Тука редовно се случува европските институции да ги заобиколат правата на националните парламенти и влади и да го менуваат Договорот без никакво легитимно овластување да го сторат тоа“, рече Орбан.
Еден од најжестоките критичари на Полска, холандскиот премиер Марк Руте повикува на остар пристап кон Варшава.
„Мораме да бидеме остри. Независноста на полското судство е клучно прашање за дискусија. Тешко е да се замисли како голема сума пари може да и се стави на располагање на Полска додека не се реши проблемот“, рече Руте.
Германската канцеларка Ангела Меркел повика на дијалог со Полска пред да преземе каква било акција.
„Мораме да најдеме начини да се вратиме заедно“, рече Меркел.