Залихите на литиум стануваат се посериозен проблем за САД, пишува CNBC.
Речиси сите производители на автомобили веќе ги објавија своите намери да се префрлат на електрични возила, Tesla испорача речиси еден милион автомобили во 2021 година, а новите играчи во секторот, како Rivian и Lucid, се подготвени да ги лансираат своите модели.
Сепак, за напојување на сите овие електрични автомобили ќе им требаат батерии во огромни количини.
Растот на производството на електрични возила се очекува да генерира повеќе од 90% од побарувачката на литиум до 2030 година, според Benchmark Mineral Intelligence. Меѓутоа, металот се користи не само таму, туку и во телефони, компјутери, керамика, лубриканти, фармацевтски производи и е од суштинско значење за складирање на сончевата и ветерната енергија.
„Тоа е како крвта во вашето тело. Ова е хемијата зад работата на литиум-јонските батерии. Останува заедничкиот именител во сите технологии за батерии, дури и оние од следната генерација. Значи, тоа е навистина критичен елемент“, рече извршниот директор на Lithium Americas, Џон Еванс.
Суровината е веќе позната како „бело злато“ поради карактеристичната сребрено бела боја, а нејзината цена вртоглаво расте. За минатата година зголемувањето е 280%.
Цената на литиумот расте, порасна за 280% од јануари 2021 година, а воспоставувањето стабилни канали за снабдување станува модерна верзија на нафтената сигурност од минатиот век. Но, Соединетите Американски Држави многу заостануваат, со само 1% од светскиот литиум извлечен и преработен.
Над 80% од светскиот сиров литиум се ископува во Австралија, Чиле и Кина. И Кина контролира повеќе од половина од светската обработка и рафинирање на метали, со три четвртини од светските литиум-јонски мегафабрики лоцирани во азиската земја, според Меѓународната агенција за енергија.
Интересно е што до 1990-тите, САД беа лидер во производството на литиум.
„Индустријата за литиум започна во Соединетите држави и добро расте веќе 50 години. Имаме значителни резерви. Предизвикот е дали можеме да го произведеме она што ни треба по конкурентна цена. Тоа е исклучително тешко“, изјави менаџерот на Swenson Technology – Ерик Нуман
Во принцип, литиумот не е дефицитен елемент. Соединетите Американски Држави имаат речиси 8 милиони метрички тони во резерва, што ги прави една од првите пет земји во светот.
Но, моментално има само еден активен рудник за литиум во земјата – Силвер Пик во Невада, кој е во сопственост на Albemarle Corporation.
Во јуни минатата година, администрацијата на претседателот Џо Бајден објави план за брзо започнување на домашното производство и рафинирање на литиум, како и производство на батерии. Поставена е национална цел за продажба на електрични возила да достигне 50% од сите возила до 2030 година.
Постојат неколку локални проекти за ископување литиум кои се развиваат во Невада, Северна Каролина, Калифорнија и Арканзас.
Controlled Thermal Resources развива проект за литиум во Салтон Си, Калифорнија, кој ќе извлекува литиум преку геотермалните централи во областа. Салтон Си некогаш беше жешка туристичка дестинација, но се претвори во една од најлошите еколошки кризи во модерната историја, бидејќи сушата пресуши голем дел од езерото.
Калифорнија сега се обидува да ја трансформира областа, нарекувајќи ја долината на литиумот и се надева дека ќе ги генерира приходите потребни за нејзино оживување.
Минатото лето, General Motors објави мултимилионска инвестиција во Controlled Thermal Resources и ги обезбеди своите први права за купување на локално произведен литиум за своите електрични возила.
Piedmont Lithium сака да оживее стара област за ископ на литиум во Северна Каролина, во близина на Шарлот. Во 2020 година, компанијата потпиша договор за снабдување со литиум на Tesla, но проектот беше одложен поради комплицираната процедура за издавање на сите потребни дозволи.
Lithium Americas планира отворен рудник во Такер Пас, кој се наоѓа во изгаснат супервулкан на околу 200 милји северно од Рено, Невада. Се верува дека има некои од најголемите резерви на литиум во САД, а проектот е во завршна фаза на добивање дозвола.
И додека мнозинството од општеството ја поздравува транзицијата на автомобилската индустрија кон алтернативни извори на енергија, никој не сака рудник во својот двор. Такер Пас и голем број други проекти се суспендирани поради тужби и отпор од еколозите.