Русија испрати повеќе војници на границата со Украина и може да изврши инвазија во секое време, вклучително и за време на Зимските олимписки игри, изјави во петокот американскиот државен секретар Антони Блинкен.
Тој рече дека Вашингтон продолжува да го повлекува персоналот од својата амбасада во Украина и го повтори повикот на Стејт департментот до сите граѓани на САД во Украина веднаш да ја напуштат земјата.
„Едноставно кажано, сè уште гледаме многу загрижувачки знаци на руска ескалација, вклучително и дека повеќе војници пристигнуваат на украинската граница“, рече Блинкен на прес-конференција во австралискиот град Мелбурн.
„Како што веќе рековме, инвазијата може да започне во секој момент, а за да биде јасно, тоа го вклучува и времето на Олимписките игри“, додаде тој.
Русија, која има повеќе од 100.000 војници долж границата со Украина, ги негира западните обвинувања дека планира да ја нападне Украина.
Зимските олимписки игри ќе се одржуваат во Пекинг до 20 февруари.
Велика Британија во четвртокот соопшти дека „најопасниот момент“ во конфликтот Запад-Русија се чини неизбежен, бидејќи Русија одржува воени вежби во Белорусија и Црното Море.
Стејт департментот на САД ги повика Американците во Украина веднаш да ја напуштат земјата поради, како што рекоа, зголемените закани од руска воена акција, а Блинкен рече дека Вашингтон ќе продолжи да ја повлекува својата амбасада.
„Ќе продолжиме со овој процес и бевме многу јасни, сите американски граѓани кои се уште се во Украина треба сега да ја напуштат земјата“, рече Блинкен.