Мировните преговори меѓу Украина и Русија ќе продолжат денеска преку видео врска.
Рускиот министер за надворешни работи Сергеј Лавров изјави дека преговорите меѓу Руската Федерација и Украина треба да продолжат и дека Русија подготвува одговор на предлозите на Украина, пренесува Тасс.
– Русија забележува дека од украинска страна доаѓа многу повеќе разбирање за ситуацијата со Крим и Донбас. Се разработуваат натамошни контакти со украинската страна, рече Лавров.
Лавров рече дека е постигнат напредок во однос на признавањето од Украина дека не може да биде дел од воен сојуз или ЕУ и дека не може да има статус на земја со нуклеарно оружје.
Објаснувајќи ги причините зошто Русија сака трансакции со гас во рубљи, тој објасни дека тоа е поради „многу несигурните“ западни партнери.
– Воопшто не се сомневам дека повеќето земји во светот разбираат што се случува во Украина и дека разбираат дека нашиот западен, многу несигурен партнер постапил на неприфатлив начин. Што се однесува до украинскиот став за настаните во Украина, вие го нарековте војна, што не е точно, рече тој, додавајќи: „Станува збор за специјална операција која се изведува со најголема грижа да не се оштети цивилната инфраструктура. Целите се воена инфраструктура и целта е да се спречи режимот во Киев да биде каква било закана за Русија“.
Рускиот министер за надворешни работи е во посета на Индија, што е последен во низата официјални претставници што ја посетија земјата.
Њу Делхи остана неутрален во однос на Украина. Премиерот Нарендра Моди повика на прекин на насилството, но не ги осуди постапките на Русија.