Папата потврди дека нема да ја посети Украина

Поглаварот на Римокатоличката црква, папата Франциск изјави дека нема да ја посети Украина, иако наводно размислувал за таа посета на почетокот на месецов.

„Каква корист е посетата на Киев, ако војната продолжи и ден потоа“, му рекол Папата на новинарот на аргентинскиот дневен весник „Насион“, цитиран од Би-Би-Си.

Папата истакна дека е „подготвен да стори сé за да ја запре војната“, но верува дека неговата посета може да ги попречи „повисоките цели“, како што се напорите за завршување на војната.