Регистрираната стапка на невработеност во Босна и Херцеговина за март 2022 година изнесува 30,7 отсто и во однос на февруари 2022 година е намалена за 0,2 процентни поени, објави Агенцијата за труд и вработување на БиХ.
Заклучно со 30 април, во Босна и Херцеговина има 365.878 лица во канцелариите и службите за вработување, што е за 6.104 лица или за 1,64 отсто помалку од март.
Според податоците на Агенцијата за труд и вработување на Босна и Херцеговина, на која се повикува Фена, од вкупниот број на лица кои бараат вработување, 211.038 или 57,68 отсто се жени.
Споредено со истиот период лани, бројот на невработени е намален за 36.268 лица или 9,02 отсто, а во однос на почетокот на пандемијата тој број е намален за 37.010 лица или 9,19 отсто.
Во Федерацијата БиХ бројот на невработени е намален за 4.470 лица (1,51 отсто), во Република Српска за 1.437 лица (2,02 отсто), а во областа Брчко во БиХ за 197 лица (3,49 отсто).
Според податоците на Агенцијата за статистика на БиХ, во март 2022 година, бројот на вработени во целата земја изнесува 841.392 лица, од кои 373.370 се жени. Во однос на февруари 2022 година, бројот на вработени е зголемен за 0,2 отсто, а на жените е зголемен за 0,5 отсто.