Аргентина и Иран аплицираа за прием во групата БРИКС (Бразил, Русија, Индија, Кина, Јужна Африка). Ова синоќа го изјави портпаролката на руското Министерство за надворешни работи, Марија Захарова, цитирана од ТАСС.
„Додека Белата куќа размислуваше што друго да исклучи, забрани или расипе низ целиот свет, Аргентина и Иран аплицираа за прием во БРИКС“, напиша портпаролката.
Претходно вчера, портпаролот на иранското Министерство за надворешни работи Саид Хатибзадех изјави дека Техеран поднел молба да биде примен во БРИКС.
Минатата недела, аргентинскиот претседател Алберто Фернандез, на состанокот на форматот БРИКС плус, ја изрази желбата на неговата земја да биде прифатена како полноправна членка на организацијата.
Групата БРИКС беше формирана целосно на економска основа. На крајот на минатата недела се одржа состанок на лидерите на земјите од БРИКС, на кој се разговараше за создавање на нова меѓународна резервна валута.