Ерменија ја извести ЕУ за новиот конфликт со Азербејџан

Ерменскиот премиер Никол Пашинјан денеска разговараше со претседателот на Европскиот совет, Шарл Мишел, за новото ескалирање на тензиите на ерменско-азербејџанската граница, соопшти ерменската влада.

Ерменија ѝ соопшти на Европската унија дека Азербејџан е одговорен за ескалацијата на тензиите околу спорната територија Нагорно-Карабах, при што и Баку и Ереван се обвинуваат меѓусебно за најновото обновување на судирите во текот на ноќта, во кои двете страни пријавија жртви, пренесува „Ројтерс“.

Претседателот на Европскиот совет рече дека ЕУ е „подготвена да вложи напори за да спречи понатамошна ескалација“ и дека „нема алтернатива за мирот и стабилноста во регионот“, се вели во соопштението на ерменската влада.