Две лица се убиени во престрелка во Братислава, пред локал во кој се собираат припадници на ЛГБТ популацијата, додека трето е рането, а осомничениот напаѓач утрово бил пронајден мртов, соопшти полицијата.
Нападот се случил во средата вечерта во близина на барот Тепларен, блиску до центарот на словачкиот главен град, јавува Би-би-си.
Информациите за мотивот не се објавени, но локалните медиуми јавуваат дека осомничениот напаѓач објавил објави на социјалните мрежи кои укажуваат на анти-ЛГБТ и антиеврејски ставови.
Младиот човек, исто така, во словачките медиуми е идентификуван како син на поранешен кандидат на екстремно десничарска политичка партија.
Премиерот на Словачка, Едуард Хегер, денеска го осуди нападот, велејќи дека секоја форма на екстремизам е неприфатлива.
„Најостро го осудувам убиството на две млади лица застрелани синоќа во Братислава од радикализиран тинејџер. Ниту една форма на надмоќ, расизам и екстремизам против заедниците, вклучително и ЛГБТИ-заедницата, може да се толерира“, напиша на Твитер словачкиот премиер.