Во светот денес има само два центри за обука на борбени делфини – базата Сан Диего во САД и Севастопол во Русија.
Русија може да користи борбени делфини за борба против Украинците во Црното Море, пишува американскиот портал „19FortyFive“, повикувајќи се на податоци на Американскиот поморски институт.
Според колумнистот Блејк Стилвел, специјално обучените морски животни успешно се користат за откривање подводни мини и воени нуркачи.
„Спречување на непријателот и специјалните сили да влезат во пристаништето е тешка задача која бара постојана будност или поседување на најновите воени технологии, што во таа ситуација може да се спореди со животно кое е секогаш свесно, дури и кога спие“, вели Стилвел.
По пристапувањето на Крим кон Русија во 2014 година, државниот океанариум, каде што претходно се обучуваа борбени делфини, влезе во јурисдикција на земјата.
Претходно, извор од безбедносните структури на Крим изјави за „Спутник“ дека во 2015 година на полуостровот биле одржани првите вежби во кои учествувале делфини.