Нападите на бродови на Крим во текот на ноќта предизвикаа прекин на учеството на Русија во договорот за извоз на жито, соопшти ТАСС, цитиран од Министерството за одбрана на Москва. Договорот со посредство на ОН беше потпишан во јули и дозволи извоз на украинско жито од блокираните пристаништа.
„Имајќи го предвид терористичкиот акт на режимот во Киев со учество на британски експерти против бродови на Црноморската флота и цивилни бродови вклучени во обезбедувањето на безбедноста на коридорот за жито, руската страна го суспендира учеството во спроведувањето на договорот за извоз на земјоделски производи од украинските пристаништа“, се вели во соопштението на тамошното Министерство.
Претходно беше кажано дека нападите со беспилотни летала главно биле одбиени иако еден брод бил оштетен.
ОН: Во контакт сме со Русите
Портпаролот на ОН рече дека се во контакт со руските власти и дека сите страни треба да се воздржат од се што ќе го загрози договорот.
Рускиот министер за земјоделство Дмитриј Патрушев рече дека само 3% од храната извезена според договорот со посредство на ОН отишла во најсиромашните земји и дека Москва има намера да испорача 500.000 тони жито во тие земји во следните неколку месеци.
Во средата, шефот за хуманитарна помош на ОН Мартин Грифитс рече дека е „релативно оптимист“ дека договорот ќе биде продолжен по средината на ноември.
Украинскиот министер за надворешни работи го коментираше развојот на настаните, велејќи дека државите треба „да бараат Русија да ги прекине игрите со глад“. Дмитро Кулеба рече дека Украина била однапред предупредена дека Русија сака да се повлече од договорот и дека Москва користи „лажен изговор“ за да го суспендира.