Украинскиот министер за финансии Сергиј Марченко денеска изјави дека Украина од почетокот на годината добила 16.7 милијарди долари од западните сојузници.
– Во 2023 година во буџетот на Украина веќе пристигна помош од странски донатори во износ од 16,7 милијарди долари. Покрај тоа, имаме гаранции од нашите партнери за дополнителна поддршка за финансирање на државниот буџетски дефицит во 2023 година, објасни украинскиот министер за финансии.
Оваа информација Марченко ја презентираше на состанокот на кој присуствуваа министри за финансии и претставници на централните банки на земјите од Г7, како и високи меѓународни лидери. Украинскиот министер за финансии им се заблагодари на учесниците на форумот за „невидените напори за мобилизирање на финансирањето“.
Оваа година Украина се соочува со буџетски дефицит од 38 милијарди долари. Дополнително, владата сака уште 14 милијарди долари за брзо санирање на критичната инфраструктура и енергетскиот сектор.
Минатата година Украина доби 32,14 милијарди долари странска помош за покривање на буџетските потреби.